Kryeministri hungarez Viktor Orban ka deklaruar sot se ai mund të vërë veton ndaj rinovimit të sanksioneve të BE-së kundër Rusisë nëse Ukraina nuk garanton rifillimin e eksporteve të gazit rus përmes territorit të saj.
“Çështja e zgjatjes së sanksioneve është në rendin e ditës”, tha Orban në një intervistë në radio të premten.
“Unë tërhoqa frenat e dorës dhe u kërkova liderëve evropianë të kuptonin se kjo nuk mund të vazhdojë. Ukrainasit po kërkojnë ndihmë, për shembull, për të vendosur sanksione ndaj rusëve. Njëherë, le të rihapim tubacionin e gazit natyror”, vijoi deklaratën e tij shefi i qeverisë në Budapest.
Sanksionet e BE-së, të vendosura ndaj Rusisë pas pushtimit të saj në Ukrainë, skadojnë më 31 janar, nëse nuk rinovohen unanimisht, sipas Financial Times.
Edhe pse ambasadorët e BE-së diskutuan për rinovimin e sanksioneve të premten, përfaqësuesi hungarez refuzoi t’i mbështeste ato, duke paraqitur tre kërkesa. Këto përfshijnë rivënien në punë të gazsjellësit tranzit nga Ukraina dhe mbrojtjen e tubacioneve që kalojnë në Bjellorusi dhe Turqi nga sulmet me dronë ukrainas
Ministrat e jashtëm të BE-së do ta shqyrtojnë këtë çështje të hënën. Nëse Orbán do të vërë në zbatim kërcënimin e tij, BE-së mund t’i duhet të modifikojë disa nga sanksionet, duke shkaktuar ndoshta masa për të ruajtur asetet e ngrira ruse me vlerë 190 miliardë euro euro në Belgjikë.
Ministri i Jashtëm hungarez Peter Szijjártó tha se Budapesti do të diskutojë çështjen e sanksioneve me SHBA-në përpara se të marrë një vendim. Në të njëjtën kohë, diplomatët evropianë e konsiderojnë të mundshme që Orbán të miratojë përfundimisht rinovimin e sanksioneve, pasi fillimisht ka negociuar lëshime të mëtejshme nga BE.
Orbán pohoi se sanksionet kanë rritur kostot e energjisë për ekonominë hungareze me 19 miliardë euro nga viti 2022, ndërsa akuzon Ukrainën se nuk ka rinovuar marrëveshjen e tranzitit të gazit me Gazprom. Hungaria ka arritur një marrëveshje me Turqinë për të importuar gaz natyror rus përmes tubacionit të fundit aktiv në Evropë, ndërsa Sllovakia dhe Austria janë në negociata të ngjashme.
Kryeministri sllovak Robert Fico ka kërkuar gjithashtu rifillimin e punës së tubacionit tranzitor rus, duke argumentuar se përfundimi i marrëveshjes do t’i kushtonte Sllovakisë 1 miliard euro euro në vit çmime më të larta të gazit natyror dhe 500 milionë euro humbje të të ardhurave nga tarifat e tranzitit.
Ndërkohë, Komisioni Evropian tha se nuk është vërejtur rritje çmimi për shkak të përfundimit të marrëveshjes, por mbetet në kontakt me shtetet anëtare.