Alajdin Sulejmani, 30-vjeçar nga Haraçina nuk i ka mbijetuar lëndimeve të rënda që mori disa orë më parë nga plumbat në afërsi të Stacionit Policor në Bit Pazar. I riu ka ndërruar jetë në sallë të operacioneve në Klinikën shtetërore në Shkup, shkruan gazeta KOHA.
Ngjarja ka ndodhur sot, pas namazit të së premtes, kur persona të paidentifikuar tani për tani, kanë gjuajtur disa plumba me pistoletë në drejtim të 30-vjeçarit i cili kishte marrë plagë në kokë, gjoks e pjesë tjera të trupit.
Alajdini ishte dërguar me urgjencë në Klinikat e Shkupit.
Policia po heton nëse të shtënat e sodit kanë lidhje me një zënkë fizike mes dy grupeve rreth dy javë më parë.
“Sot (25.04.2025) rreth orës 14:00 në SPB-Shkup është raportuar se në rrugën ‘Vojdan Çernodrinski’ në zonën e Bit Pazarit ka pasur të shtëna me armë zjarri. Në vendngjarje kanë mbërritur zyrtarët e Policisë së Stacionit të Policisë “Bit Pazar”, të cilët kanë konstatuar se bëhet fjalë për një përleshje të armatosur, gjatë së cilës një person ka mbetur i plagosur rëndë dhe është transportuar në Qendrën Emergjente në Kompleksin Klinikë ‘Nënë Tereza’. Në vendngjarje janë gjetur gëzhoja të shumta. Po merren masa për zbardhjen e rastit”, thonë nga MPB.
Ndryshe, Alajdini është djal i të ndjerit Nazmi Sulejmanit – Komandant Arusha nga Haraçina. (koha.mk)