Rruga e Matkës nuk u rregullua as këtë verë

Kjo rrugë të çon në Matkë, një ndër vendet më të frekuentuara turistike që ka Shkupi.

Megjithatë rruga që të shpien atje është e parregulluar dhe plot me gropa.

Ata të cilët kalojnë çdo ditë nga kjo rrugë ankohen për gjendjen e keqe të udhës dhe kërkojnë që të zgjerohet.

Rruga e cila të çon për në Matkë ka shumë gropa në të, gjë e cila e vështirëson kalimin e turistëve.

Më pengojnë. Duhet ta rregullojnë, turistët vijnë këtu. Unë vij punoj këtu dhe është shumë e ngushtë rruga, duhet të zgjerohet. Nuk kushton ajo shumë para.

Normal që më pengojnë, pikë së pari unë nuk e kuptoj përse në mes të fshatit e kanë bërë këtë rrugën, edhe nëse e kanë bërë përse nuk e rregullojnë siç duhet.

-Çfarë kërkese kishe bërë deri te komuna?

-Nuk jam i vetmi që kërkoj, ata e dinë më mirë, më mirë sa më shpejtë t’i bëjnë kushtet.

Se kur do të rregullohet kjo rrugë TV21 pyeti kryetarin e komunës së Sarajit, Blerim Bexheti, i cili sqaroi që janë duke përgatitur projekt për këtë rrugë.

“Komuna e Sarajit është duke përgatitur projekt për ndërtimin e rrugës në Matkë të Poshtme ku tanimë janë kryer matjet gjeodezike dhe punohet për fazat tjera të projektit.”- deklaroi Blerim Bexheti, kryetar i komunës së Sarajit.

Matka njihet për kanionin e saj dhe freskinë verore, ndërsa në perëndim të Shkupit, rreth 15 km nga qendra./TV21