“Kujdesuni për muajin e Ramazanit, bëni sa më shumë vepra të mira, e ndoshta do të shkruheni prej të shpëtuarve”, është një nga thëniet që ka inspiruar pronarin e një restorani në Çarshinë e Vjetër të Shkupit, që këtë muaj të shenjtë t`u dhurojë iftare nëpër shtëpitë e tyre, familjeve me status të rezikuar social por edhe jetimëve.
Asan Asani, pronar i këtij biznesi që ka vendosur të organizojë këtë aksion gjatë këtij muaji, thotë se kjo nuk është hera e parë që ndihmon, por për shkak të numrit të madh të nevojtarëve, ka kërkuar ndihmën edhe të donatorëve që të mund të shpërndahen edhe më shumë iftare se vitet e kaluara.
“Çdo vit kemi ndihmuar skamnorë por këtë vit pamë që ka mungesë të madhe sepse çmimet janë rritur shumë dhe ne bëmë këtë ide që me ndihmën e donatorëve të kontribuojmë më së shumti dhe të ndihmojmë më së shumti skamnorët dhe tu dalim në krah në këtë muaj të shenjtë të Ramazanit” – tha Asan Asani.
Thotë se deri më tani janë siguruar rreth 1.000 iftare dhe njofton se iftaret u dërgohen familjeve nëpër shtëpitë e veta.
“U’a dorëzojmë shtëpi, numri është i madhë deri më tani me ndihmën e donatorëve ka arritur numri deri më 1 mijë iftare, kemi filluar nga dje dhe do të ndihmojmë deri në ditën e fundit të Ramazanit që tu dalim krah skamnorëve. Kisha lutur që sa më shumë donator, të kemi më shumë përkrahje që t’i ndihmojmë skamnorët sepse me të vërtetë është një numër shumë i madh që nuk mund t’i arrijmë të gjithë dhe ne nuk mund, s`di edhe si ta them ka edhe shumë familje që kërkojnë përkrahje por nuk i kemi mundësitë për të gjithë” – tha Asan Asani.
Për ditën e sotme është paraparë shpërndarja e 150 iftareve e të gjithë ata që duan ta ndihmojnë këtë aksion mund ta bëjnë atë duke paguar 250 denarë për një iftarë me prezencë fizike në objektin që ndodhet në hyrje të Çarshisë së Shkupit ose edhe përmes bankës në xhirollogarinë e hapur me numër 270-0739569801-02. /tvklan.mk/