Më 15 dhe 16 prill, të hënën dhe të martën, Kryeministri Talat Xhaferi, duhet të marrë pjesë në një konferencë ndërkombëtare në Prishtinë organizuar nga “Forumi Ndërkombëtar i grave, për paqë dhe siguri”
Vizita në Prishtinë e Kryeministrit Xhaferi vjen në kohën e debateve të nxehta për implikimin e Kryeministrit të Kosovës, Albin Kurti dhe Lëvizjes Vetëvendosje në zgjedhjet e dyfishta në Maqedoninë e Veriut.
Kjo vizitë në Prishtinë, nuk është bërë me ftesë të Kryeministrit të Kosovës, por të Presidentes së Kosovës, Vjosa Osmani.
Ngurimi nga takimi Xhaferi – Kurti, sipas analistëve, duhet parë në pozicionimin e Qeverisë së Kosovës pro bllokut opozitar VLEN, në Maqedoninë e Veriut.
Merret vesh se “për të mos pasur implikime në procesin zgjedhor” në Maqedoninë e Veriut, Qeveria e Kosovës ka ofruar që takimi Kurti – Xhaferi të realizohet në fillim të qershorit.
Por, në media është publikuar njoftimi se për zgjedhjet në Maqedoninë e Veriut, Kryeministri i Kosovës dhe liderët e VLEN-it do të jenë së bashku në tubimet e javës së ardhshme në Gjermani dhe Zvicër.
Rikujtojmë se në listën e kandidatëve të VLEN-it për deputetë ka edhe tre përfaqësues të LVV-së, njëri prej të cilëve është këshilltar i Kryeministrit të Kosovës, Albin Kurti. /tvklan.mk/