Elfet Ismaili ka dhënë dorëheqjen e saj të parevokueshme nga posti i Zëvendës Ministres së Mbrojtjes në Republikën e Maqedonisë së Veriut. Lajmin e bëri të ditur vetë Ismaili përmes një njoftimi publik, ku theksoi se vendimi është marrë pas një vlerësimi të thelluar personal dhe profesional.
“Në ushtrimin e këtij funksioni kam qenë e udhëhequr nga përkushtimi institucional, transparenca dhe përgjegjësia ndaj qytetarëve dhe interesit shtetëror,” shkruan ajo, duke shtuar se dorëheqja është një hap i nevojshëm dhe në përputhje me bindjet e saj.
Ismaili shprehu falënderime për Kryeministrin Hristijan Mickoski për besimin e dhënë, si dhe për kreun e Aleancës për Shqiptarët, Arben Taravari, për mbështetjen dhe mundësinë për të përfaqësuar partinë në këtë pozitë të rëndësishme.
“Mbështetja për institucionet dhe kontributi në shërbim të interesit publik do të mbeten gjithmonë prioritet i imi, pavarësisht pozitave që mbaj,” përfundon deklaratën e saj Ismaili.