Ministri i Administratës Publike, Goran Minchev, reagon ndaj deklaratave të zv.kryeministrit Izet Mexhiti për punësime masive në administratën publike dhe i bën thirrje të mos sillet si Alisa në Tokën e Çudirave.
Deklarata e zv.kryeministrit Mexhiti në një ngjarje partiake për punësime masive në administratën publike brenda një viti është një shembull klasik i populizmit para zgjedhjeve, pa asnjë bazë ligjore apo institucionale. Për këtë arsye, do t’i kërkoja zotit Mexhiti që të mos sillet si Alisa në Tokën e Çudirave, duke premtuar diçka që as është reale, as e mundshme pa shkelur procedurat ligjore dhe parimet e administratës së mirë, thotë Minchev.
Ministri Minchev thekson se punësimet në institucionet shtetërore zhvillohen në përputhje me nevojat e institucioneve, duke marrë miratimet paraprake. Sipas tij, të gjitha punësimet bazohen në parimet e kompetencës, profesionalizmit dhe gatishmërisë profesionale të kandidatëve.
Ministria e Administratës Publike është e angazhuar fort për të respektuar sistemin meritokratik, që do të thotë se punësimet dhe avancimet në sektorin publik duhet të bazohen vetëm në cilësinë dhe aftësitë e kandidatëve, dhe jo në përkatësinë e tyre etnike apo politike. Politika e punësimeve populiste jo vetëm që do të dëmtonte integritetin e administratës, por do të rrezikonte edhe reformat që kanë si qëllim krijimin e një administrate publike efikase, profesionale dhe depolitizuar, shton Minchev.
Ai thekson se institucionet duhet të funksionojnë në mënyrë profesionale dhe se sektori publik nuk është një treg parazgjedhor.
Qytetarët e Republikës së Maqedonisë meritojnë institucione që funksionojnë në mënyrë profesionale dhe transparente, dhe jo një administratë të ndërtuar mbi premtime populiste. Prandaj, apelon për përgjegjshmëri dhe qasje reale ndaj politikave publike, dhe jo për premtime joreale që shërbejnë vetëm për të grumbulluar pikë politike përpara zgjedhjeve, thotë Minchev.