Klasa e nëntë në shkollën fillore “Bajram Shabani” në Kondovë po mbanë orën e informatikës, mirëpo edhe pse kjo lëndë ka të bëjë me kompjuterët, të gjithë ato janë jofunksionale. Kjo pasi që janë vjedhur kompjuterët kryesor gjatë pushimit dimëror.
Ndihmësdrejtori i kësaj shkolle, Mensur Jakupi për TV21 theksoi se nuk është hera e parë që po vidhet kjo shkollë.
“Me datën 17, 18 të muajit janar, në shkollën fillore “Bajram Shaban” në fshatin Kondovë është bërë një vjedhje e rëndë, ku janë vjedhur 2 kompjuterë, nga i cili rast ka ngecur edhe mësimi, i gjithë rasti është i lajmëruar në polici, po hetohet rasti dhe ne presim përgjigje nga ata”, u shpreh Mensur Jakupi, ndihmësdrejtor.
Sipas tij, me mosfunksionalizimin e kompjuterëve mund të dështoj edhe testimi ekstern që do të mbahet gjatë muajit maj.
Ministria e Brendshme theksoi se është e njohur me rastin e vjedhjes që ka ndodhur në këtë shkollë dhe se po zhvillohen hetime.
“Ky rast është paraqitur në policinë rajonale në Gjorçe Petrov në ditën kur nxënësit u kthyen nga pushimi dimëror. Lidhur me këtë rast po zhvillohen hetimet dhe policia është në kërkim të autorëve të grabitjes”
Nga drejtoria e shkollës theksojnë se kamerat e sigurisë kanë kapur grabitësit që ishin të maskuar dhe se këto materiale i janë dorëzuar MPB-së. Sipas tyre, kjo është vjedhja e tetë deri më tani në këtë shkollë.
