Inspektorët nga Inspektorati Shtetëror Sanitar dhe Shëndetësor kanë konstatuar lëshime gjatë trajtimit të foshnjës shtatë muajshe nga Shkupi, e cila ka ndërruar jetë. Prej dy ditësh inspektorët po kërkojnë përgjigje nëse ka pasur lëshime gjatë trajtimit të foshnjës. Inspektimi i jashtëzakonshme është kryer në tri spitale edhe atë në Klinikën Universitare për Sëmundje të Fëmijëve, Klinika Infektive dhe Klinika e Dermatologjisë, ku foshnja është kontrolluar nga mjekët, mëson PortaliX nga burime në Inspektoratin Shtetëror Sanitar.
Pritet që nesër Inspektorati Shtetëror Sanitar dhe Shëndetësor të ndajë të gjitha detajet për inspektimin e kryer.
Ky është rasti i katërt i vdekjes së një fëmije në Klinikën e Fëmijëve për vetëm disa muaj. Rasti i fundit ishte me një vajzë pesëvjeçare, e cila vdiq nga një infeksion në tru.
