Në Kongresin e pestë të Bashkimit Demokratik për Integrim që po mbahet sot në Shkup, kryetari i partisë, Ali Ahmeti, prezantoi pesë rezoluta kryesore, të cilat sipas tij janë të domosdoshme për të konsoliduar shtetin, për të forcuar barazinë dhe për të nxitur zhvillimin e vendit, raporton TS.
1. Zgjedhja e Qeverisë me shumicë të dyfishtë (Badenteri Ekzekutiv)
Ahmeti propozoi që çdo qeveri e re të marrë besimin e Kuvendit jo vetëm me shumicën e deputetëve, por edhe me shumicën e komuniteteve jo-shumicë. Ky mekanizëm synon të sigurojë legjitimitet të dyfishtë dhe përfaqësim real për të gjitha etnitë.
2. Zbatimi i parimit të Badenterit në Gjykatën Kushtetuese
Vendimet që prekin të drejtat e komuniteteve jo-shumicë nuk duhet të miratohen pa konsensus të ndërsjellë në Gjykatë, duke ruajtur integritetin e ligjeve dhe besimin e qytetarëve në drejtësi.
3. Thellimi i decentralizimit dhe vetëqeverisjes lokale
Ahmeti theksoi rëndësinë e transferimit të kompetencave në arsim, shëndetësi, zhvillim lokal dhe administrimin e pasurive publike. Ai propozoi gjithashtu pavarësi financiare për komunat dhe ndikim të drejtpërdrejtë të qytetarëve në politikat lokale.
4. Shteti i së drejtës dhe vetingu i plotë për funksionarët publikë
BDI kërkon hetim gjithëpërfshirës për bartësit e funksioneve publike në 34 vitet e fundit, verifikim të pasurisë së tyre, si dhe hetim të privatizimit dhe organeve të sigurisë që nga viti 1945. Ky proces synon drejtësi të pakompromis dhe besueshmëri institucionale.
5. Marrëveshja Kombëtare për Përparim
Ali Ahmeti propozon një marrëveshje gjithëpërfshirëse për zhvillim ekonomik, social dhe institucional, ku përfshihen të gjitha komunitetet dhe ekspertët. Fokusin kryesor e vendos në ekonomi konkurruese, digjitalizim, energji të qëndrueshme, arsimin, shëndetësinë, rininë dhe integrimin evropian.
“Këto pesë masa janë themeli për një Maqedoni të Veriut stabile, funksionale dhe të drejtë për të gjithë qytetarët e saj,” tha Ahmeti, duke nënvizuar se BDI do të vazhdojë të jetë forca e unitetit, stabilitetit dhe integrimit europian.
Kongresi i BDI-së konsiderohet një moment kyç për drejtimin e partisë dhe vizionin politik për të ardhmen e vendit./TS

