Nga Policia sot njoftuan se gjatë ditës së shtunë kanë privuar nga liria një 48-vjeçari nga fshati Tanushë, përcjell TV21. Sipas njoftimit të MPB-së, i njëjti nuk posedonte dokumentacione për mallin të cilin po e transportonte.
“Me datë 19.04.2025 rreth orës 19.20 në fshatin Pobozhje, komuna Çuçer Sandevës, zyrtarë policorë nga reparti policor i Mirkovci pranë SPB-Shkup kanë ndaluar një automjet tip Mercedes me targa të Shkupit, i drejtuar nga E.A. (48) nga fshati Tanushë, rajoni i Shkupit. Gjatë kontrollit në automjet janë gjetur 192 pako mallra për të cilat personi nuk posedonte asnjë dokumentacion. Për shkak të dyshimit për kryerjen e veprës penale “kontrabandë” nga neni 278 i Kodit Penal, E.A. është privuar nga liria dhe bashkë me automjetin u dërgua në stacion të policisë”, thonë nga MPB.