Aleanca për Shqiptarët mban një mbledhje të jashtëzakonshme të Kryesisë Qendrore të partisë, ku në fokus të diskutimeve është pjesëmarrja në zgjedhjet lokale.
Mbledhja do të zhvillohet në një format të zgjeruar, ku përveç anëtarëve të kryesisë morën pjesë edhe kryetarët e degëve të partisë.
Para nisjes së mbledhjes, sekretari i përgjithshëm i ASH-së, Blerant Ramadani, dha një prononcim për media, duke theksuar rëndësinë e kësaj mbledhjeje.
“Një nga pikat kryesore do të jetë diskutimi për pjesëmarrje në zgjedhjet lokale. Aq sa është kjo mbledhje e jashtëzakonshme, është edhe e zakonshme, pasi ne si parti organizojmë mbledhje në baza mujore,” tha Ramadani.
“E veçanta e kësaj mbledhjeje është se është paraparë të jetë në format më të zgjeruar, ku do të jenë edhe kryetarët e degëve. Për ne është e rëndësishme të dëgjojmë zërin e çdo aktivisti të ASH-së dhe të hapim debat, pasi debati është vlerë e demokracisë.”
Pritet që pas përfundimit të mbledhjes, partia të dalë me qëndrime të qarta për strategjinë e saj në zgjedhjet e ardhshme lokale./ ZYRTARE.net