Shkup, 6 prill – Kanë kaluar 21 ditë dhe Qeveria ende po fsheh faktet kyçe dhe përgjegjësit për tragjedinë më të madhe që ka përjetuar Koçani. Më 16 mars humbëm 60 jetë të reja dhe sot, 21 ditë më vonë, ende jemi në zi – por ajo që dhemb më shumë është që e vërteta po fshihet dhe askush nuk po mban përgjegjësi. Kështu akuzon BDI, e cila pyet se çfarë ndodhi me kamerat e sigurisë kur të gjithë e dinë që serverët kanë mbijetuar!.
“A është e vërtetë që pamjet tregojnë festa me pjesëmarrjen e zyrtarëve lokalë të policisë disa ditë para tragjedisë? A ishin ata të pranishëm edhe ditën e ngjarjes? Kush i ka ato pamje, kush i fshehu dhe pse nuk janë bërë publike deri më sot? I drejtohemi Dhomës së Kompanive të Sigurisë – a ka qenë e licencuar agjencia ‘Rubikon’? Sa prej të punësuarve të saj kanë qenë të licencuar sipas ligjit? Dhe në fund – e gjithë hierarkia lokale policore, nga stacioni deri te Ministri, kanë ditur që lokali punonte pa licencë, se përdorej piroteknikë dhe lëndë narkotike. Dhe të gjithë kanë heshtur. Sot, 21 ditë më vonë, asnjë nuk ka marrë përgjegjësi – as morale, as ligjore”.
Kjo heshtje, thuhet më tej në reagimin e BDI-së, nuk është vetëm turp institucional – kjo është bashkëfajësi. “Dhe ne nuk do të lejojmë që e vërteta të fshihet dhe përgjegjësia të shmanget”.
