Kryetari i Kuvendit, Talat Xhaferi, tha se rasti me Klinikën e Onkologjisë nuk duhet të kalojë pa u ndëshkuar dhe se beson se organi gjyqësor do ta konfirmojë besimin që i është deleguar, përcjell FLAKA.
“Lajmi i fundit me Klinikën e Onkologjisë është një konfirmim i devijimit dhe humbjes së humanizmit mes nesh. Nuk duhet të jemi të verbër dhe të shurdhër, kjo nuk duhet të kalojë pa u ndëshkuar. Besoj se autoriteti gjyqësor do ta konfirmojë besimin e deleguar nga të gjithë ne”, tha Xhaferi.
Ai tha në fjalimin e tij për Ditën e Pavarësisë se është koha për të pritur lajme të mira dhe pozitive.
“Që të jetë kështu, është koha të jemi të gjithë përgjegjës, me një pamje të qartë dhe një vizion të qartë për të ardhmen, e cila nuk duhet të ketë drejtim tjetër përveç shtetit të së drejtës, respektimit të të drejtave dhe detyrimeve e të gjithë qytetarëve të Republikës së Maqedonisë së Veriut, e cila është shtëpi e përbashkët e të gjithëve, ta mbajmë, ta zhvillojmë dhe ta përmirësojmë për ne, për qytetarët tanë dhe për të gjithë brezat e ardhshëm, të cilët e shohin të ardhmen e tyre aty ku i takon natyrshëm në Republikën e Maqedonisë së Veriut, anëtare e plotë e NATO-s dhe BE-së”, tha Xhaferi. FLAKA
