More

    Vazhdojnë grevat në sektorin publik, Qeveria shpreson për një zgjidhje të qendrueshme

    Lidhja e Sindikatave të Maqedonisë ka zbatuar grevën e paralajmëruar të përgjithshme në sektorin publik me të cilën kërkohet rritje lineare e pagave për 2806 denarë dhe kthim i së drejtës për pushim vjetor.

    Dje vendosi 120 vende bosh para Kuvendit, duke dashur t’u kujtojë deputetëve që të pranojnë amendamentin me të cilin kërkohet në ribalancin e Buxhetit të ndahen mjete për rritjen lineare të pagave dhe për sot ka paralajmëruar se do të vendosë 21 karrige para Qeverisë.

    Greva do të mbahet çdo ditë nga ora 10 deri në 11, në mënyrë që të punësuarit në sektorin publik në atë periudhë të ndërpresin procesin e punës dhe të dalin jashtë dhe vetëm dhjetë për qind prej tyre do të punojnë aty ku duhet për raste urgjente.

     

    Sindikata shprehet e kënaqur me rrjedhën e grevës e cila njoftoi se do të zgjasë deri në plotësimin e kërkesave. Kryetari i SSM-së Darko Dimovski dje tha se vetëm në një kompani në fillim të grevës ka pasur presione ndaj punëtorëve, ndërsa vlerësoi disa institucione dhe kompani që tashmë kanë filluar të nënshkruajnë marrëveshje që punëtorët nga 1 korriku të marrin 2806 denarë.

    “Pra, kemi edhe një situatë të tillë, por në fund të ditës në 13:00 sekretarët tanë rajonalë do të dorëzojnë raporte dhe kudo që ka presion mbi punëtorët dhe bordet e grevës, do të ndodhë e njëjta gjë si pardje me deputetët, do t’i shpallim publikisht ata drejtorë dhe drejtues apo bartës të atyre pozitave që na bëjnë presion që të mos bëjmë grevë, tha Dimovski.

    Qeveria, nga ana tjetër, është e mendimit se duhet të rriten pagat, por thonë se duhet gjetur një zgjidhje e qëndrueshme, e jo problemet të zgjidhen me zgjidhje ad hok.

    “Marrëveshja e Përgjithshme Kolektive dhe dialogu social për Marrëveshjen e Përgjithshme Kolektive duhet të vazhdojë dhe do të vazhdojë dhe aty do të gjejmë zgjidhjen sistematike, dhe kjo është një metodologji e re që do të përfshihet në Marrëveshjen e Përgjithshme Kolektive dhe që do të thotë zgjidhje sistematike e problemit pagave në sektorin publik, përkatësisht rritje e vazhdueshme e pagave të punëtorëve në sektorin publik, tha dje ministrja e Punës dhe Politikës Sociale Jovana Trençevska.

    Sipas saj, rritja lineare e pagave për 2806 denarë nuk është zgjidhje.

    “Qeveria tregon vullnet politik, gatishmëri për të gjetur zgjidhje dhe apelojmë që të vazhdojë dialogu social për të arritur një zgjidhje që do ta zgjidhë problemin e të punësuarve në sektorin publik”, tha Trençevska.

    Kërkesa e LSM-së për rritje lineare të pagave ditën e djeshme ka qenë edhe në fokus të sherreve partiake. Opozita akuzoi deputetët e qeverisë se nuk e ka votuar amendamentin për ndërhyrje në ribalancin, duke ua vështirësuar jetën punëtorëve.

    “Deputetët e LSDM-së votuan kundër propozimit të LSM-së për rritje lineare të pagave në sektorin publik për 2806 denarë. LSDM ua ka vështirësuar jetën dhjetëra mijëra familjeve. Rritja lineare e pagës që LSDM-ja e refuzoi, në fakt ishte obligim ligjor i qeverisë për ta zbatuar, të cilin nuk e respektojnë, dhe rrjedh nga Ligji për Rritjen e Pagës Minimale, i cili në vetvete kërkon harmonizim linear të të gjitha pagave, tha zëdhënësi i VMRO-DPMNE Marija Miteva në një konferencë për shtyp.

    Nga LSDM-ja kanë thënë se kanë premtuar rritje të pagave në afat prej gjashtë muajsh dhe se kjo do të bëhet.

    Greva në sektorin publik pasoi pasi Lidhja e Sindikatave të Maqedonisë pa se në ribalancin e buxhetit nuk janë parashikuar mjete për kërkesën e tyre, ndonëse, siç thonë ata, ishte premtuar gjatë negociatave me zyrtarë të qeverisë. Dje në objektin e LSM-së është mbajtur një takim me ekipin ekonomik të Qeverisë, por nuk ka dhënë fryte.

    Ndërkohë në Komisionin kuvendor për Financa dhe Buxhet ka vazhduar debati për ribalancin e Buxhetit. Në këtë seancë nuk u pranua amendamenti me të cilin kërkoheshin para për propozimin e LSM për rritje lineare të pagave për 2.806 denarë.

    Deri më tani janë shqyrtuar 13 nga 204 amendamentet e propozuara dhe asnjëri prej tyre nuk është miratuar.
    Dita e djeshme ishte e gjashta nga gjithsej dhjetë ditët, të cilat janë parashikuar në Rregulloren e Komisionit amë. Janë dorëzuar gjithsej 204 amendamente, nga të cilat mbi 170 nga grupi parlamentar i VMRO-DPMNE, 28 nga Aleanca e Shqiptarëve dhe dy nga shumica parlamentare.

    TË NGJAJSHMEARTIKUJ
    Rekomanduar për ju

    Të fundit

    Drejtori ShA MEPSO Orhan Murtezani mer pjesë në Asamblenë e Përgjithshme të ENTSO-E

    Drejtori Gjeneral i ShA MEPSO z. Orhan Murtezani merr pjesë në Asamblenë e Përgjithshme të ENTSO-E, si anëtar zyrtar. Në...

    Shtrenjtimi i rrymës, Bislimovski: Çmimi i ri nuk dëmton amvisëritë e vogla

    Kryetari i Komisionit Rregullator për Energjetikë Marko Bislimoski edhe sot foli për çmimet e reja të energjisë elektrike. Ai...

    Bekteshi: Kufizime nuk do ketë, na pret një dimër i vështirë

    Kufizime të energjisë elektrike nuk do të ketë, por do të jetë një dimër i vështirë jo vetëm për...

    Seancë për interpelancën ndaj kryetarit të Kuvendit, Talat Xhaferi

    Në Kuvendin e Republikës së Maqedonisë së Veriut sot duhet të mbahet seanca plenare e 77-të me pikën e...
    WordPress Ads