Në qytetin Tambun, në provincën Java Perëndimore të Indonezisë, është hapur një ekspozitë ku vizitorët mund të shohin reliktet e profetit Muhamed, raporton Anadolu Agency (AA).
Ekspozita tërhoqi shumë vëmendjen e njerëzve të zonës që duan të shohin objektet që ruajnë kujtimet e profetit Muhamed. Ekspozita vizitohet nga të moshuarit dhe shumë të rinj.
Vizitorët mund të shohin të paktën dhjetë relikte të profetit Muhamed si këpucë, çallma, shpata dhe shkopinj.
Qëllimi i ekspozitës është ruajtja e kujtimit dhe rritja e dashurisë së muslimanëve për të Dërguarin e Zotit.
Muhamedi ishte profeti i fundit i Zotit, sipas Islamit, i cili u dërgua nga Zoti te mbarë njerëzimi për të plotësuar besimin origjinal monoteist të të gjithë profetëve para tij, Ademit, Ibrahimit, Musait, Isait dhe profetëve të tjerë.
I lindur më 26 prill të vitit 570 në qytetin e Mekës, Muhamedi humbi prindërit në moshë të re dhe u rrit nën kujdesin e xhaxhait të tij Abu-Talib. Profeti Muhamed ndërroi jetë më 8 qershor të vitit 632 në Medine.