Kjo deponi përreth magjistrales Tetovë-Shkup, më saktësisht në komunën e Zhelinës, ka tre ditë që po digjet.
“Deponia në fshatin Dëbërcë është duke u djegur 3 ditë me radhë, përderisa banorët janë duke qëndruar në tym, kryetari i komunës pretendon se kjo deponi është djegur qëllimisht”, raporton Senat Zylbehari, gazetar TV21.
Kryetari i Zhelinës Blerin Sejdiu gjithashtu thotë se ka tre vite me radhë kërkuar nga ministria mjete për pastrimin e të njëjtës, por kërkesa nuk është marrë parasysh.
“Unë tre vite me radhë bëj kërkesë në ministrin e ambientit edhe përgjigja na kthehet negative, kurse ministri ambientit në fushatë vinë në këtë fshat dhe thotë se unë do ta heq këtë deponi. Sa i përket deponisë, dyshojmë se është ndezur nga dora njeriut pasi deponia është ndezur natën dhe flaka ka marr përnjëherë”, pohoi Blerim Sejdiu, kryetar i komunës së Zhelinës.
Edhe Sejdiu, para zgjedhjeve, u ka premtuar banorëve se deponia do të pastrohet, ndërsa shprehet se nuk do ta lërë mandatin pa përmbushur këtë premtim.
Ne nëse nuk kemi përgjigje do të detyrohemi ta pastrojmë pasi që kemi thënë se do ta pastrojmë edhe do ta pastrojmë dhe unë nuk do të dalë nga komuna pas mos e pastruar këtë deponi tërësisht që gjendet parapa meje.
Zjarrfikësit e Tetovës thonë se kanë 48 orë që po mundohen ta shuajnë zjarrin.
“Brenda ditës kemi pas 13 raste, gjatë natës 6 raste dhe kjo deponi që po shihni këtu që është një katastrofë që ndodh në rrafshin e Pollogut, pasi që faktori njëri është ai që bën. Është një situatë këtu brenda 48 orëve mbrëmë me komunë e Zhelinës ishim tërë natën këtu, pasi deponitë nuk shuhen me ujë dhe duhet makineri e rëndë që ta groposim edhe ta shuajmë tërësisht”, tha Avni Ameti, komandat i NJTKZ Tetovë.
Para dy javësh një deponi tjetër u ndez në komunën e Bërvenicës, e si pasojë qyteti i Tetovës për ditë më radhë ka qenë nën tym, ndërsa ndotja e ajrit në Tetovë dhe Zhelinë ka qenë mbi normën e lejuar.
